Suderburg
Lüttje Wost

De lüttje Wost hebt de Katten freten

“Dat schönste weer in´n Winder das Slachen,
                                   denn kregen wi Kinner een lüttje Wost!”

Slachten harr up´n Dörp dorto hört, as de Wost up´t Brot.
Un bi´n Slachten harrn de Navern nich blots hulpen,
se harrn ok Breuh kregen un ok Wost un Fleesch.
Dat harr reegum gohn, vertell Spiller´s Gerhard.
So harr jedereen ok mol wat Frischet up´n Disch hatt,
as dat noch keen Isschapp geev.

Hausschlachter Otto Heitsch bei Sebeke auf dem Hof, im Winkel 2

De Geschicht vun de lütje Wost.
In´n Krieg,nägenteinhunnerteenunveerdig,
harr dat wän, kort vör Wiehnachten, as Isings slacht harrn.
Morns freuh harr dat Swien luut quiekt,
as he in de School gohn harr.
Tiedig harrn de Kerlslüüd to´n Dootholn kommen.
So een Swien harr jo jümmer goot dree Zentner wogen,
mannigmol ok veer bet fief Zentner.
Allns harr perot stohn mößt, as de Slachter keem.
Dat Woder in´n Kettel dä al dampen,
de Fudderköök weer dorvun vernävelt.
Un buten stünn de Breuhtrog un de Ledder,
an de dat Swien no´t Afbreun uphängt wörr.
Gerhard vertell, as dat bi´n Slachten freuher togüng.
As Kinner harrn se sogor schoolfree kregen.
Un he meen, in´t Dörp harr dat jo noch keen Strotenlicht geven. Stickendüster harr dat in´n Winder morns
un avends up´e Stroot west,
em harr mannigmol angst un bang worrn
in´n Düstern up´n Footstieg.
Jüst ok den Avend,
as Isings slacht harrn un he sikk avends een lüttje Wost holt hett.
Up den Footstieg mang de Hüüs unner de groden Eken,
twischen Tees un Säfkes harr he keen Hand vör Ogen sehn kunnt.

GPS
N  52°53.44.3”
O  010°26.57.4”

De Wind harr dörch de Bööm gohn,
Hunen harrn bellt, un Katten harren sik wrangelt.
“Mik weer nich goot to Sinn, dor heff ik mik een Leed fleut,
hen un trüch up den Weg”,
meuk Spillers Gerhard de Geschicht spannt.
As he de lüttje Wost kregen un sik ordig bedankt harr weer he in´n Düstern eerstmol an Isings Tuun stohn bleven un harr hörkt.
Teemlich luut harr he denn wedder fleutjepiept un de Wost an´n Zeigefinger bammelt un rumdüddelt, as een Propeller.
“Vun Katten un Hunnen heff ik nix mehr hört,
ik heff mik blots up de Wost to´n Avenbrot höögt”,
weer Gerhard sien Snack.
Goot un schön, harr ik jüst dacht, wat nu woll kummt.
Un richtig, nu keem de spannte Moment.
Gerhard harr de lüttje Lebberwost,
de frisch ut´n Kettel komen harr, so duul düdelt,
dat dat Enn, wo se anbunnen weer,
losgüng un de Wost in´n hogen Bogen wegflegen dä.

“Dat hett mik dropen, as een Slag”, duur dar Gerhard hüt noch.
Blots dat Wostband harr he noch an´n Zeigefinger hatt.
De Wost weer weg.
He woll noch hinnerher, aver in´n Düstern harr he nix sehn kunnt.
Un een Lücht to holn to´n seuken, dat harr nich mehr nödig doon, meen Gerhard, de Katten harrn sick al um de Wost in de Plünn kregen.
“Dat weer een bannigen Schreck in de Avendstunn”,
weer sien Snack.
He harr blarrt, de Tronen weern em komen,
aver dorvun harr de Wost ok nich trüch komen.
“Miene lüttje Wost hebbt de Katten freten,
dor möß ik mik mit affinnen”, vertell Gerhard.
Sien Mudder harr em düchtigbeduurt.
Aver an de lüttje Wost vun dormols dä he jümmer noch denken,
as de Snack um´t Slachten gohn dä.
 

www.Suderburg-Damals.de
Suderburg
© 1999 - 2015, Gerhard Müller; Design und Layout

[Suderburg] [Historie] [Historisches] [Sagen] [Ortsteile] [Arbeit] [Hofstellen] [Wiesenbauschule] [Hardau] [Grußkarten] [Vereine] [Schulen] [Gasthäuser] [Gesellschaft] [Gedichte] [Straßen] [Landkarten] [Platt] [G. Müller] [Füerwehr] [Muskanten] [De Fiedel] [Jehann] [Kreihen] [Holxer Möhl] [Lüttje Wost] [Gerichtslinn] [De griese Page] [Riemel] [Pingstboom] [Wiegenlieder] [Amtskää] [Swatsuur] [Plattschnacker] [Rodio] [Naturdenkmale] [Heide] [Hist. Spaziergang] [Allgem.Zeitung] [Umgebung] [Gesundheit] [Auswanderung] [Forschung] [Bücher] [Damals - Heute] [Kontakt] [Empfehlungen] [Quellen] [A - Z]