De swatten Kreihen oder wi´n seggen dä:
“Die swatten Raben!”

Unne Dörpslüüd in Seborg deiht´n ümme girn mol´n Snack.
Besünners een Snack vun gistern un över de ole Tied.
Ick weet nich recht, ob dat alle Minschen so girn dot,
aver mi gefallt dat jerenfalls good.
Dat is wi mit´n olen Johrgang vun´n Win:

Je öller, um so bäre!

Nülich seten wi bi´n Kröger “Spiller” an´n Stammdisch.
Unkel Otto ut Hössen mit binoh achttig johr wörr ok dorbi,
un mit eenmol füng de Kröger sülmst an,
vunne swatten Raben to vertellen.
Dat wier eene Dörpskapell west,
de woll mehr as veerdig Johr in Seborg
un ok up anne Dörper Musik mokt harr.
Mannige lustige Begevenheeten gevt doröver to vertelln.
Unkel Otto harr jümm kenn´nihrt, dor wörr he good uté School.
Dormols in Homersdörp,
so um negenteinhunnerttwindig.
De Kapell dä nich so,n Dudelkrom späln,
nee, de späl ´ne goode Blosmusik, dor wackel de Wand.
Dorvun dot hüt noch de oln Lüüd vertelln.
Un Sluck un Beer drünken de Kirslüüd ok

Bi Spiller´s up´n Sool

De Sool wör ümme bannig in Stimmung.
Sicker´n beten mehr as hüt, wo´n nix mehr drinken dörft, vunwägen de Promille un so.
Dormols günn dat rund bi´n Marsch, Schieber, Tampete, Walzer un Polka!
Un deiht´n hüt sünne Geschichten vun fröher hörn,
stellt´n sick lieks dat so vör, wi´t dormols wän is,
as Oma un Opa junge Lüüd wörrn.
Der Kröger wüß ok´n Gedicht up de Kapell uptoseggn:

   De swatten Raben!
   Oberin deiht de Geige strieken,
   sien Söhn up´t klavier de Finger smieten,
   Möhln August spält de Klarinett,
   Adolf Behrens dorto de Trompet,
   un dormit de Kapell vullkomm´n is,
   holt Bakeberg dan Baß good wist!

Hinnerk Voigts

Oberin = Schauster Hermann Oberin un sin Söhn
Möhln August = August de Möhlnarbeiter
Adolf Behrens = De Trompeter
Bakeberg = Bakeberg vun Bonhofswech
 

www.Suderburg-Damals.de
Suderburg
© 1999 - 2010, Gerhard Müller; Design und Layout

[Suderburg] [Historie] [Historisches] [Sagen] [Ortsteile] [Arbeit] [Hofstellen] [Wiesenbauschule] [Hardau] [Grußkarten] [Vereine] [Schulen] [Gasthäuser] [Gesellschaft] [Gedichte] [Straßen] [Landkarten] [Platt] [G. Müller] [Füerwehr] [Muskanten] [De Fiedel] [Jehann] [Kreihen] [Holxer Möhl] [Lüttje Wost] [Gerichtslinn] [De griese Page] [Wiegenlieder] [Plattschnacker] [Radio] [Naturdenkmale] [Heide] [Hist. Spaziergang] [Allgem.Zeitung] [Umgebung] [Gesundheit] [Auswanderung] [Forschung] [Bücher] [Damals - Heute] [Lage] [Kontakt] [Gästebuch] [Empfehlungen] [Quellen] [A - Z]